ابوشامل

پوڙهي ٿئي نه زمين، جهونو ٿئي نه سج
هن ٻنيءَ مٿان ٻج ڪئي هاريندڙ هليا ويا
شاہ عبد اللطیف بھٹائی کی دھرتی سندھ کی زبان قدیم بھی ہے اور شیریں بھی۔ عربی رسم الخط کی زبانوں میں ممتاز مقام کی حامل سندھ زبان پاکستان کی مقامی زبانوں میں بھی امتیازی خصوصیت کی حامل ہے اور صوبہ سندھ کی باضابطہ زبان ہونے کے ساتھ بھارت کی 22 باضابطہ زبانوں میں سے ایک ہے۔
حال ہی میں اردو محفل کے ایک دھاگے پر کمپیوٹر پر سندھی زبان کی تنصیب کا معاملہ زیر بحث آیا اور اس کی اہمیت کو مدنظر رکھتے ہوئے اس امر کو ضروری سمجھا کہ کمپیوٹر پر سندھی زبان کی تنصیب کو مرحلہ وار بیان کیا جائے تاکہ پاکستان کی قومی زبان اردو کے علاوہ دیگر علاقائی زبانوں کے افراد بھی اپنی زبانوں میں اظہار خیال کر سکیں۔
ونڈوز ایکس پی میں سندھی کی سپورٹ نصب کرنا بہت آسان ہے۔ حالانکہ سندھی بطور زبان منتخب نہیں کی جا سکتی لیکن اس کو عربی رسم الخط میں لکھی گئی زبانوں کے ذریعے شامل کیا جا سکتا ہے۔ ہم اس مقصد کے لیے عربی، فارسی اور اردو کو استعمال کر سکتے ہیں۔
سب سے پہلا قدم:
اگر آپ کے کمپیوٹر پر عربی اسکرپٹ کی سپورٹ انسٹال نہیں ہے تو آپ پہلے قدم کے طور پر عربی سپورٹ شامل کرنا ہوگی۔ اگر عربی سپورٹ شامل ہے تو آپ اِس پہلے مرحلے کے بجائے براہ راست مرحلہ نمبر دو سے شروع کریں۔ پہلے مرحلے میں آپ Control Panel > Regional & language options > languages میں جا کر install file for complex script and right-to-left languages پر چیک مارک لگا دیں اور applyکر دیں۔ اس کے بعد آپ سے ونڈوز ایکس پی کی سی ڈی بھی مانگی جائے گی اور سسٹم ایک مرتبہ ری اسٹارٹ بھی ہوگا۔

اب اس ربط سے سندھی زبان کا انسٹالر ڈاؤن لوڈ کریں اور Unzipکرنے کے بعد اس کا installerچلا دیں۔ یہ آپ کے سسٹم میں کلیدی تختہ (keyboard) نصب کر دے گا۔

اب تیسرے مرحلے میں آپ کو ایک عربی رسم الخط والی زبان منتخب کرنا ہوگی اور اس کے IME/Keyboardکے طور پر MBSindhi 2004 کا انتخاب کرنا ہوگا۔ آپ یہ کام Control Panel میں Regional and Language Options … > Languages > Details… > Add پر جا کر کر سکتے ہیں۔ اس مقام پر آپ کو input language عربی، فارسی یا اردو کا انتخاب کرنے کے بعد نیچے ڈراپ ڈاؤن فہرست سے MBSindhi 2004 کلیدی تختہ منتخب کرنا ہوگا۔ اس طرح سندھی آپ کے کمپیوٹر پر نصب ہو جائے گی۔


اگلا کام آپ کو فونٹس نصب کرنا ہے اس کے لیے ایم بی لطیفی سب سے بہترین فونٹ ہے جبکہ ایم بی سندھی ویب انٹرنیٹ براؤزنگ کے لیے بہت شاندار فونٹ سمجھا جاتا ہے۔ یہ دونوں فونٹس ڈاؤن لوڈ کردہ فائل میں موجود ہیں۔ آپ کو صرف اتنا کرنا ہے کہ فونٹس کی دونوں فائلوں کو کاپی کر کے اپنے کنٹرول پینل میں موجود فونٹس کے فولڈر میں پیسٹ کر دیں۔

لیجیے اب آپ اپنے کسی بھی ورڈ پروسیسر یا ایڈیٹر میں سندھی لکھ سکتے ہیں۔

سندھی کلیدی تختہ اور اس کے معیاری ترین فونٹس کی تمام تخلیق سیاٹل، امریکہ میں مقیم سندھی زبان کے عظیم محسن محترم عبد الماجد بھرگڑی صاحب کی اعلی مہارت کا حاصل ہے۔ انٹرنیٹ پر سندھی زبان کے فروغ کے لیے اُن کی کوششیں قابلِ تحسین اور مادری زبان پر اُن کا احسانِ عظیم ہیں اور ان کا یہ احسان شاید کئی نسلیں نہ اتار سکیں۔

ویب سائٹ کسی تعارف کی محتاج نہیں، دنیا بھر کے گرافک ڈیزائنرز اور فوٹو گرافرز اپنی تخلیقات اور عکاسی کی رونمائی کر کے نہ صرف داد سمیٹتے ہیں بلکہ ان کے اعلٰی کام کو دیکھ کر مجھ جیسے نو وارد اپنے کام میں نئی جہتیں لاتے ہیں۔
چند ماہ قبل برادر ساجد اقبال نے اپنی ایک پوسٹ میں پر فلکر Flickr اکاؤنٹ سے تصاویر سائیڈ بار میں شامل کرنے کا طریقہ بتایا تھا تو دل سے ایک خواہش اٹھی تھی کہ کاش کوئی ایسا پلگ ان ہوتا جس سے Deviantart.com کے اکاؤنٹ سے اپنی تخلیقات و تصاویر بلاگ پر پیش کرپاتا۔ اس خواہش کو عملی جامہ پہنانا میرے بس کی تو بات نہ تھی اس لیے انتظار کے علاوہ اور کوئی چارہ بھی نہ تھا۔ بالآخر تین ماہ بعد ایک ایسا پلگ ان مل گیا جس کے ذریعے آپ پر اپنے یا کسی بھی ساتھی کے اکاؤنٹ سے تصاویر و تخلیقات کو اپنے بلاگ کی سائیڈ بار میں شامل کر سکتے ہیں اور یہ پلگ ان ہے Deviant Thumbs
سب سے پہلے یہ پلگ ان اس جگہ سے ڈاؤن لوڈ کر کے اپنے بلاگ پر اپ لوڈ کر دیں (میں ون کلک استعمال کرتا ہوں) اور پلگ انز میں جا کر activate کر دیں۔


اب Presentation یا Design میں جا کر Widgetsمیں چلے جائیں جہاں آپ کو Deviant Thumbsکا Widget بھی نظر آئے گا۔

آپ اس کو شامل کر کے اس کی ترجیحات میں تبدیلی کر سکتے ہیں یعنی کتنی تصاویر سائیڈ بار میں دکھائی جائیں اور کون سے کھاتے سے حاصل کی جائیں وغیرہ۔ بس آپ کی پلگ ان کام کرنا شروع کر دے گی اور آپ کے تجویز کردہ کھاتے سے بالکل اسی طرح تصاویر دکھائے گی جس طرح اِس بلاگ کے سائیڈ بار میں آپ کو دکھائی دے رہی ہیں۔

امید ہے ان بلاگرز کے لیے فائدہ مند ہوگی جو Deviantartپر کھاتے کے حامل ہیں یا اس کے دلدادہ ہیں۔